Журналист әлеуметтік, ұлттық, рулық, нәсілдік, тектік немесе діни алауыздықты қоздыру туралы қылмыстық іс аясында екі айға қамауға алынды

Астанада «Ахуал Сегодня» YouTube арнасының авторы Азамат Омаров қамауға алынды. Бұл туралы «Азаттық Азия» хабарлады.

20 шілде күні кешке құқық қорғаушы Бақытжан Төреғожина Омаровтың ұсталғанын мәлімдеген. Келесі күні журналистің мүддесін қорғайтын адвокат Төлеген Шайықов бұл ақпаратты «Азаттық Азия» тілшісіне растады.

Адвокаттың айтуынша, Астана соты Азамат Омаровты Қылмыстық кодекстің 174-бабы («Әлеуметтік, ұлттық, рулық, нәсілдік, тектік немесе діни алауыздықты қоздыру») бойынша қозғалған іс аясында екі айға қамауға санкция берген. Қорғаушы сот қаулысына шағым түсіргенін және апелляциялық соттың шешімін күтіп отырғанын айтты.

Сот қаулысына сәйкес, қылмыстық істің қозғалуына Омаровтың видеоларының бірінде президент пен қазіргі билік туралы айтқан сатиралық пікірлері негіз болған.

«Бұл пікір ирониялық әрі сын сипатында болғанымен, қоғамда теріс көзқарас қалыптастырады», — деп келтіреді адвокат сот қаулысынан үзіндіні. Оның айтуынша, Азамат Омаров өзіне тағылған айыппен келіспейді.

Журналист өз үйінде ұсталған. Төлеген Шайықовтың сөзінше, тінту барысында Омаровтың компьютерлері, қатқыл дискілері мен ұялы телефондары тәркіленген.

«Ахуал Сегодня» YouTube арнасында Азамат Омаров Қазақстандағы өзекті оқиғаларға қатысты пікірін жариялап келген. Кейінгі видеоларының бірінде ол президент Қасым-Жомарт Тоқаев пен бұрынғы президент Нұрсұлтан Назарбаев туралы ойын айтқан. Кейін бұл видео авторлық құқықтың бұзылғаны жөніндегі шағымнан кейін өшірілген. Осыған ұқсас бірнеше шағымнан кейін журналист сәуір айында бұрынғы YouTube арнасын жауып, жаңа арна ашқан.

Источник: Factcheck.kz